Sæunn Stefánsdóttir

Sæunn Stefánsdóttir Prenta út Senda hlekk á þessa síðu til vinar
Ég er fædd 4. ágúst 1978. Foreldrar mínir eru Stefán Þórarinsson (f. 1952), stjórnarformaður Nýsis hf. og Kristrún Þórðardóttir (f. 1954), sérkennari og höfuðbeina- og spjaldhryggsmeðferðaraðili. Systir mín er Svava Lóa Stefánsdóttir (f. 1983), sagnfræðingur Ég giftist Kjartani Erni Haraldssyni (f. 1977), jarðfræðingi og kennara, 8. janúar 2005 og búum við í Vesturbænum í Reykjavík.  Við eignuðumst dóttur í maí 2008 sem heitir Kristrún Edda.

Ég fæddist í Reykjavík og fluttist kornung til Seyðisfjarðar. Þar bjó ég og ólst upp fram að skólaaldri en þá fluttist ég með fjölskyldu minni aftur til Reykjavíkur, nánar tiltekið í Vesturbæinn þar sem ég hef búið síðan með rúmlega tveggja ára viðkomu á Grænhöfðaeyjum undan Afríkuströnd.

Námsferill:
Ég lauk námi í viðskiptafræði í Háskóla Íslands haustið 2003. Þar áður stundaði ég nám einn vetur í frönsku fyrir útlendinga við L’Universitè Paul Valery í Montpellier í Frakklandi. Árið 1998 varð ég stúdent af eðlisfræðibraut Menntaskólans í Reykjavík.

Starfsferill:
Frá því haustið 2007 hef ég unnið á skrifstofu rektors Háskóla Íslands sem sérfræðingur. Þingmaður var ég veturinn 2006-2007 eftir að Halldór Ásgrímsson lét af þingmennsku. Þar áður var ég aðstoðarmaður Jón Kristjánssonar, heilbrigðis- og tryggingamálaráðherra, og síðar félagsmálaráðherra ásamt því að vera varaþingmaður frá 2003 til 2006. Með skóla vann ég lengst hjá Flugfélagi Íslands. Þar vann ég sumur og vetur í afgreiðslu og farmiðasölu á Reykjavíkurflugvelli frá stofnun félagsins 1999 til 2002. Ég var einnig flokksstjóri í Vinnuskóla Reykjavíkur og liðsmaður fatlaðs manns hjá Félagsþjónustunni í Reykjavík svo eitthvað sé nefnt. Tók virkan þátt í stúdentapólitíkinni og var m.a. lánasjóðsfulltrúi Stúdentaráðs Háskóla Íslands 2001 til 2002.

Félagsstörf: 
  • Í ritstjórn Skinfaxa, skólablaðs MR 1996
  • Í stjórn Framtíðarinnar, nemendafélags MR 1996-1997
  • Forseti Framtíðarinnar 1997-1998
  • Í Stúdentaráði Háskóla Íslands 2001-2003
  • Í stjórn Stúdentaráðs 2001-2003, fyrst sem gjaldkeri stjórnar og síðar sem varamaður í stjórn
  • Formaður lánasjóðsnefndar SHÍ 2001-2002
  • Fulltrúi SHÍ í stjórn LÍN 2001-2002
  • Varamaður í stjórn Félagsstofnunar stúdenta 2001-2002
  • Fulltrúi stúdenta í kynningarráði Háskóla Íslands 2001-2002
  • Ég lék handknattleik með sigursælu liði KR og Gróttu-KR alla yngri flokkana og upp í meistaraflokk auk nokkurra landsleikja fyrir handknattleikslið kvenna 16 ára – og 18 ára og yngri.

Fyrir Framsóknarflokkinn hef ég gegnt ýmsum trúnaðarstörfum eins og:

  • Í stjórn FUF-RN (félags ungra framsóknarmanna í Reykjavík norður) frá 2003, fyrst sem varamaður og síðan aðalmaður
  • Í stjórn SUF (Sambands ungra framsóknarmanna) 2004-2006
  • Formaður fræðslu- og kynningarnefndar SUF 2005-2006
  • Í  miðstjórn Framsóknarflokksins frá 2003 bæði sem varamaður og aðalmaður
  • Var kosinn ritari flokksins í ágúst 2006

Nefndir og ráð:
Síðastliðin ár hef ég setið í og stýrt ýmsum ráðum og nefndum, svosem:

  • Nefnd um heimsminjaskrá, skipuð af menntamálaráðherra 2007
  • Hverfisráði Vesturbæjar, formaður, skipað af borgarstjórn 2006. Varaformaður frá hausti 2008. 
  • Innflytjendaráð 2005-2007, formaður, skipað af félagsmálaráðherra. Lauk störfum vorið 2007. 
  • Verkefnisstjórn um þjónustu við geðfatlaða 2005-2007, skipuð af félagsmálaráðherra. Lauk störfum vorið 2007. 
  • Faghópi um bætta lýðheilsu þjóðarinnar, skipaður af forsætisráðherra 2005. Lauk störfum 2006. 
  • Samráðsnefnd til að semja drög að lyfjastefnu og nýjum lyfjalögum,  skipuð 2004 af heilbrigðis- og tryggingamálaráðherra. Lauk störfum 2007
  • Nefnd um flutning verkefna á sviði heilbrigðismála frá ríki til sveitarfélaga, formaður, skipuð af heilbrigðis- og tryggingamálaráðherra 2003. Lauk störfum 2004.
  • Á þingi sat ég í efnahags- og viðskiptanefnd þar sem ég var varaformaður, einnig í utanríkismálaefnd, menntamálanefnd og heilbrigðis- og tryggingamálanefnd