Jafnrétti kynjanna er sjálfsagt og eðlilegt markmið í stjórnmálum og öllum samfélagsmálum yfirleitt. Oft er mikið talað en minna gert. Í Framsóknarflokknum er staðan sú að af sex ráðherrum eru þrjár konur og þrír karlar – fullt jafnrétti. Þrjár konur leiða lista okkar og þrír karlar – fullt jafnrétti. Heildarhlutföll á framboðslistum eru næsta jöfn. Við höfum nú þegar náð árangri sem við óskum að aðrir flokkar nái einhvern tíma líka.
Nokkrar staðreyndir sem sýna að framsóknarmenn láta verkin tala í jafnréttismálum:
Þáverandi félagsmálaráðherra Framsóknarflokksins, Alexander Stefánssonar, lagði fyrstur fram í ríkisstjórn sérstaka framkvæmdaáætlun í jafnréttismálum. Segja má að síðari áætlanir hafi í öllum höfuðatriðum verið settar upp með líkum hætti og þessi fyrsta áætlun sem Alexander Stefánsson kynnti fyrir Alþingi árið 1986. Ísland varð þar með í hópi þeirra ríkja sem fyrst settu sér slíka áætlun.
Framsóknarmenn tryggðu að sett voru lög um fæðingar- og foreldraorlof sem höfðu það að markmiði að tryggja barni samvistir bæði við föður og móður, þ.e. að gera bæði konum og körlum kleift að samræma fjölskyldu- og atvinnulíf. Réttur til fæðingarorlofs var tryggður hvort sem er á opinberum eða almennum vinnumarkaði eða hjá þeim sem eru sjálfstætt starfandi.
Jón Kristjánsson, þáverandi félagsmálaráðherra, fékk samþykkt í ríkisstjórn tillögu um að annar sunnudagur í nóvember ár hvert yrði helgaður feðrum og tekinn upp í Almanak Háskólans. Farið var í þessu að fyrirmynd Norðurlandanna en þau heiðra feður þennan sama dag. Þess má geta að annar sunnudagur maímánaðar hefur til margra ára verið helgaður mæðrum víða um heim, þar á meðal hér á landi.
Í tíð sinni sem iðnaðar- og viðskiptaráðherra, beitti Valgerður Sverrisdóttir sér fyrir gerð samstarfssamnings sem felur m.a. í sér að árlega verði birtar upplýsingar um stöðu jafnréttis innan íslenskra fyrirtækja og að birtar verði upplýsingar um hlutfall kvenna í stjórnum stærstu fyrirtækja hér á landi, í samræmi við tillögur í skýrslu tækifærisnefndar iðnaðar- og viðskiptaráðherra um aukinn hlut kvenna í yfirstjórnum fyrirtækja. Þessar upplýsingar verða m.a. notaðar til að móta svokallaða jafnréttiskennitölu í fyrirtækjum sem ætlað er að sýna hvaða árangri fyrirtæki hafa náð í jafnréttismálum. Samstarfsaðilar samningsins eru auk ráðuneytisins Rannsóknasetur vinnuréttar og jafnréttismála við Viðskiptaháskólann á Bifröst, Samtök atvinnulífsins, Félag kvenna í atvinnurekstri, Jafnréttisráð og Jafnréttisstofa.
Þá hefur Magnús Stefánsson félagsmálaráðherra kynnt tillögur samráðshóps sem hafði það verkefni að undirbúa vottun jafnra launa hér á landi. Markmiðið með tillögunum er að fá fyrirtæki og stofnanir til að afla sér vottunar á því að unnið sé með markvissum hætti að launajafnrétti kynjanna. Þegar hafa fjölmörg fyrirtæki sýnt verkefninu áhuga og óskað eftir þátttöku í því.
Magnús Stefánsson félagsmálaráðherra hafði einnig frumkvæði að því að á síðasta ári samþykkti ríkisstjórn Íslands að stofna sérstakan rannsóknarsjóð, Jafnréttissjóð, sem ætlað er að veita fé til rannsókna á stöðu kvenna og karla á vinnumarkaði. Til rannsókna í þessu sambandi teljast meðal annars rannsóknir á stöðu kynjanna á vinnumarkaði og enn fremur rannsóknir á áhrifum gildandi löggjafar, svo sem ákvæða laga um fæðingar- og foreldraorlof og um sjálfstæðan rétt feðra til fæðingarorlofs. Sérstaklega er horft til þátttöku ungra vísindamanna í þessum rannsóknarverkefnum. Markmiðið með stofnun Jafnréttissjóðs er að tryggja að hér á landi verði unnar vandaðar rannsóknir á stöðu kynjanna á vinnumarkaði en slíkar rannsóknir geta verið lykill að bættri stöðu kvenna og karla og flýtt fyrir framgangi jafnréttis. Mikilvægt er að þeir sem vinna að stefnumótun stjórnvalda hafi vandaðar upplýsingar í höndunum þegar verkefnum er forgangsraðað enda er baráttan gegn kynbundnum launamun forgangsmál og að því verkefni erum við framsóknarmenn að vinna með markvissum og skipulögðum hætti.
